近年經常都話「生仔要考牌」，《尋人記 II》第8集主角梁惠英 早喺80年代已經係「媽媽界」學藝KOL，英姐1989年曾接受《星期一檔案》訪問，佢為咗做「好媽媽」，主動去「防止虐待兒童會」學習唔靠藤條教小朋友。

事隔多年，攝製隊憑一名學員女兒就讀嘅幼稚園鎖定屯門安定邨，再透過邨內「防止虐待兒童會」辦公室職員幫忙，成功尋獲英姐。相隔33年再次受訪，最大分別係當年未有亮相嘅英姐老公華哥終於出鏡自我介紹，澄清一家並非「單親家庭」。

華哥笑言自己係屋企嘅「茄喱啡」，太太先係主角。全程笑嘻嘻嘅華哥，喺大仔阿Ken 提及彈琴往事時，仲忽然金句王上身大讚：「方東昇唔怕彈架！」阿Ken即醒目接招：「因為佢冇得彈。」搞到平時金句唔停口嘅方東昇 「紅都面晒」。

英姐當年喺鏡頭前略帶表情略顯擔憂，對兩子關懷備至；今時今日更加多咗一份威嚴同嘮叨，難得兒子Ken同Eric不時開媽媽玩笑，母子間吃飯話題更由留班「升級」到爛 Gag IQ 題，一家人樂也融融。

談及當年嘅「好媽媽」課程，Eric透露英姐曾因出入「防止虐待兒童會」一度被誤會虐兒，不過英姐豪不介意；而今日已為人父嘅Ken就大讚課程有效，仲同英姐等整理咗課程五大要素：

攝製隊又安排英姐同當年課程導師黃姑娘重逢，三十多年後再見，兩人興奮尖叫，又「加料」安排佢哋同另一同學電話「相認」。黃姑娘又寄語英姐同其他家長學會「斷捨離」，唔好「養兒一百歲，長憂九十九」，黃姑娘話：「父母嘅角色到咗咁上下要淡番出嚟，仔大女大要學吓識錫自己，我覺得做父母嘅付出好大，其實小朋友大個就唔使你照顧架喇。」

方東昇喺結尾亦話：「媽媽嘅最高境界，唔係陪子女成長，而係同子女一起成長」，至今仍學習如何做一好媽媽嘅英姐，對大仔Ken即將移民，就示範為人父母應如何放下：「我係唔捨得阿Ken飛架，但佢有佢嘅前途，佢有佢嘅打算，不如學吓放下」、「佢有頭家，我哋做父母嘅，梗係希望佢好好哋照顧屋企，咁你屋企好，我哋唔使掛心你，咁大家都安心咯。」

來源：TVB 娛樂新聞台 TVB Entertainment News